Beynəlxalq Futbol Federasiyaları Assosiasiyasının (FIFA) Hakimlər Departamentinin rəhbəri Pyerluici Kollinanın sözlərinə görə, heç kim dünya çempionatında ədalət təmsilçilərinin dürüstlüyünü şübhə altına ala bilməz.

Tvit.az xəbər verir ki, bu barədə Pyerluici Kollina FIFA-nın mətbuat xidmətinə xüsusi açıqlama verib.

O bildirib ki, FIFA hakimləri heç bir kənar təsirə, hətta təşkilatın hazırkı prezidenti Canni İnfantinonun belə müdaxiləsinə boyun əymirlər.

"Əlbəttə ki, qərarların konstruktiv müzakirəsi hər zaman futbolun bir parçası olacaq, lakin əsassız ittihamların idmanımızda yeri yoxdur, - deyə Kollina vurğulayıb. - Heç kim dünya çempionatı matçlarını idarə edən hakimlərin dürüstlüyünü şübhə altına ala bilməz. Belə hallar baş verdikdə, bu, həm onların, həm də ailələrinin ünvanına təhdidlərə yol açan reaksiyalara səbəb ola bilər. Bu, qətiyyən yolverilməzdir".

Baş hakim daha sonra qeyd edib: "Eyni şəkildə, heç kim iddia edə bilməz ki, FIFA-nın hakimliyinə kimsə, hətta FIFA prezidenti Canni İnfantino belə təsir edə bilər. O bizim tam müstəqil şəkildə işləməyimizə etibar edərək, FIFA-nın hakimlər briqadasına həmişə hərtərəfli dəstək nümayiş etdirib. Hakimlər ədalətli qərarlar qəbul edirlər və futbolçular, eləcə də məşqçilər kimi, hər zaman əllərindən gələnin ən yaxşısını etməyə çalışırlar".

Xatırladaq ki, bir müddət əvvəl bir sıra referilər dünya çempionatı matçlarındakı qərarlarına görə ciddi tənqidlərə məruz qalmışdılar. Xüsusilə, Argentina və Misir yığmaları arasındakı 1/8 final oyunundan (3:2) sonra hakim Fransua Leteksye misirli azarkeşlərin təhdidləri səbəbindən sosial şəbəkə hesablarını bağlamalı olmuşdu.

Digər səs-küylü hadisə isə ABŞ millisinin hücumçusu Folarin Baloqana verilən qırmızı vərəqənin ləğv edilməsi olmuşdu. ABŞ Prezidenti Donald Tramp cəzanın ləğv olunmasını şəxsən İnfantinodan xahiş etmişdi.