Azərbaycanın yunan-Roma güləşçisi Eldəniz Əzizli beşinci dəfə dünya çempionu olmağın onun üçün xüsusi əhəmiyyət daşıdığını bildirib.

Tvit.az xəbər verir ki, 55 kq çəki dərəcəsində qızıl medal qazanan idmançı bu barədə Dünya Güləş Birliyinin (UWW) rəsmi saytına açıqlamasında danışıb.

Əzizli ötən il dünya çempionatında üçüncü yeri tutmasını arzuladığı nəticə hesab etmədiyini və bu uğursuzluqdan sonra qarşısına yeni hədəflər qoyduğunu deyib:

"Ötən il çempionatda üçüncü yeri tutdum, amma bunu ciddi uğur hesab etmirdim. Ümid etdiyim nəticə deyildi. Buna görə bir il ərzində çalışdıq, qarşımıza məqsədlər qoyduq və onlara çatmaq üçün mübarizə apardıq. Düşünürəm ki, bu il yenidən dünya çempionu olmağı məndən çox istəyən yox idi".

Beşqat dünya çempionu qazandığı qələbənin hisslərini sözlə ifadə etməyin çətin olduğunu vurğulayıb. O, Beyləqandan başlayan idman yolunu, Bakıda keçdiyi məşqləri, yaşadığı çətinlikləri və məğlubiyyətləri xatırladıb:

"Bunu sözlə ifadə etmək həqiqətən çətindir. Sanki bütün karyeram gözlərimin önündən keçdi. Beyləqandan başlayan yolda Bakıda məşq etmək, çətinliklərdən keçmək, məğlubiyyətlər yaşamaq və nəhayət, beşinci dəfə dünya çempionu olmaq möhtəşəm hisslərdir".

34 yaşlı güləşçi uzun illərdir davam edən karyerasının miqyasını da diqqətə çatdırıb. Onun sözlərinə görə, yarımfinalda qarşılaşdığı gürcüstanlı və finaldakı iranlı rəqibi dünyaya gələndə o, artıq Avropa çempionu idi.

"Güləş karyeramı 27-28 ildir davam etdirirəm. Karyeram onların bütün ömrü qədər davam edib", - deyə idmançı əlavə edib.

Qeyd edək ki, Qazaxıstanın Astana şəhərində keçirilən dünya çempionatının finalında Eldəniz Əzizli İran təmsilçisi Payam Əhmədiyə 3:1 hesabı ilə qalib gəlib. Azərbaycanlı güləşçi ilk dünya çempionluğunu 2018-ci ildə qazanıb, 2022, 2023 və 2024-cü illərdə də ardıcıl olaraq fəxri kürsünün ən yüksək pilləsinə qalxıb. Astanadakı qələbə onun beşinci dünya çempionluğu olub.