Avropa İttifaqından kənarda, sığınacaq müraciəti rədd edilmiş şəxslər üçün nəzərdə tutulan ilk miqrant yerləşdirmə mərkəzləri artıq 2026–2027-ci illərdə yaradıla bilər.

Tvit.az xəbər verir ki, bu barədə Danimarkanın Baş naziri Mette Frederiksen Financial Times qəzetinə müsahibəsində bildirib.

Onun sözlərinə görə, belə mərkəzlərin yaradılması üzərində Avropa Komissiyasının dəstəyi ilə bir qrup Aİ ölkəsi çalışır. Frederiksen deyib:

“Bu, Avropa Komissiyasının dəstəyi ilə yaradılacaq bir növ könüllülər koalisiyası olacaq. 2026–2027-ci illərdə Avropadan kənarda yerləşən ilk mərkəzin fəaliyyətə başladığını görəcəyik”.

Baş nazir vurğulayıb ki, bu cür mərkəzlər beynəlxalq hüquqa və insan hüquqlarının qorunmasına dair Avropa standartlarına uyğun fəaliyyət göstərməlidir.

Qeyd edilib ki, miqrasiya siyasətinin sərtləşdirilməsi fonunda bu cür mərkəzlərin yaradılması ideyası bir sıra Aİ ölkələrinin dəstəyini qazanıb.