Gündəlik 7-8 saatlıq yuxu demensiyanın (ağıl zəifliyi) inkişaf riskinin ən aşağı səviyyədə olması ilə birbaşa bağlıdır. Həm yuxu çatışmazlığı, həm də normadan artıq yuxu isə xəstəlik ehtimalını artırır.

Tvit.az xəbər verir ki, bu nəticə "PLOS One" jurnalında dərc olunan araşdırmada göstərilib.

Tədqiqatçılar 4,5 milyon insanın iştirak etdiyi 69 elmi işin nəticələrini birləşdirərək həyat tərzinin üç əsas amilini qiymətləndiriblər: yuxu müddəti, fiziki aktivlik səviyyəsi və oturaq vəziyyətdə keçirilən vaxt. Təhlil göstərib ki, məhz 7-8 saatlıq yuxu demensiya riskinin ən aşağı olduğu intervaldır.

Bu normadan kənara çıxmalar riski artırır. Belə ki, 7 saatdan az yuxu təxminən 18 faiz daha yüksək risklə, 8 saatdan çox yuxu isə 28 faiz artımla əlaqələndirilir. Alimlər qeyd edirlər ki, artıq yuxu da ən az çatışmazlıq qədər mənfi amil ola bilər.

Əlavə olaraq müəyyən edilib ki, az hərəkətli həyat tərzi də mühüm rol oynayır. Gündə 8 saatdan çox oturaq vəziyyətdə olan və həftədə 150 dəqiqədən az fiziki aktivlik göstərən insanlar demensiya ilə daha tez-tez üzləşirlər.