ABŞ Federal Ehtiyat Sisteminin (FED) üç üzvü inflyasiyanın azaldılması üçün faiz dərəcələrinin daha yüksək səviyyədə saxlanılmasının vacibliyini bildirib.

Tvit.az "Yahoo Finance"a istinadən xəbər verir ki, Sent-Luis Federal Ehtiyat Bankının prezidenti Alberto Musalem inflyasiyanın hələ də yüksək və genişmiqyaslı olduğunu vurğulayaraq pul siyasətinin tezliklə daha da sərtləşdirilməsinin vacib olduğunu deyib.

Onun sözlərinə görə, faizlərin vaxtında artırılması inflyasiyanın iqtisadiyyatda möhkəmlənməsinin qarşısını ala və sonradan daha kəskin tədbirlərə ehtiyacı azalda bilər.

Dallas Federal Ehtiyat Bankının prezidenti Lori Loqan isə inflyasiyanı hədəf səviyyəsinə qaytarmaq üçün faiz dərəcələrinin ümumilikdə ən azı 50 baza bəndi (0,5 faiz bəndi) artırılmasını dəstəklədiyini bildirib. O, artımların mərhələli şəkildə həyata keçirilməsinin iqtisadiyyata mənfi təsirləri azalda biləcəyini qeyd edib.

Loqanın fikrincə, tədricən sərtləşdirmə ev təsərrüfatlarına, bizneslərə və maliyyə bazarlarına yüksək faiz dərəcələrinə uyğunlaşmaq üçün imkan yaradacaq.

Aysel Şirinova