Polşa Kalininqrad vilayəti ilə sərhəddə yeni ərazi müdafiə briqadası yaratmağı planlaşdırır.

RMF24 radiostansiyasının məlumatına görə, Polşa komandanlığı 4-cü Varmiya-Mazuriya Ərazi Müdafiə Briqadasını sərhəd müdafiəsi üzrə ixtisaslaşmış hərbi birləşməyə çevirmək niyyətindədir.

Yeni strukturun əsas vəzifələri sərhədyanı ərazilərin monitorinqi və sərhəd xidmətinə dəstək olacaq. Təhlükə yarandığı təqdirdə briqada sərhədin müdafiəsini müstəqil şəkildə həyata keçirə biləcək.

Briqadanın komandiri bildirib ki, yenidən təşkilatlanmanın 2026-cı ilin sonunadək başa çatdırılması planlaşdırılır. Bununla belə, tam döyüş hazırlığına nail olmaq üçün daha iki il vaxt tələb olunacaq.

Qeyd edək ki, oktyabrın 22-də Rusiya Dövlət Dumasının keçmiş deputatı Andrey Kolesnik Polşanın “Qara Pantera” tanklarını Kalininqrad vilayəti sərhədinə yaxın ərazilərə yerləşdirməsinin Rusiyaya qarşı mümkün hərbi təxribat hazırlığına işarə edə biləcəyini iddia edib. O, Moskvanın bölgədəki bütün hərbi manevrləri diqqətlə izlədiyini bildirib.